ಅಮೆರಿಕ: 21 ವರ್ಷವಾದವರಿಗೆ ಗ್ರೀನ್‌ ಕಾರ್ಡ್‌ ಇಲ್ಲ!USA: No green card for those aged 21 and above

ಆಗಸ್ಟ್ 15 ರಿಂದ ಅಮೆರಿಕದ ಹೊಸ ಪೌರತ್ವ ನಿಯಮಗಳು ಜಾರಿಗೆ ಬರುತ್ತಿದ್ದು, ಗ್ರೀನ್ ಕಾರ್ಡ್ ನಿರೀಕ್ಷೆಯಲ್ಲಿದ್ದವರಿಗೆ ಭೀತಿ ಶುರುವಾಗಿದೆ. ಎಚ್‌-1ಬಿ ಮತ್ತು ಇತರ ವಲಸೆಯೇತರ ವೀಸಾಗಳನ್ನು ಹೊಂದಿರುವ ಲಕ್ಷಾಂತರ ಭಾರತೀಯರಿಗೆ ಭೀತಿ ಶುರುವಾಗಿದೆ. ಗ್ರೀನ್‌ಕಾರ್ಡ್‌ ನಿರೀಕ್ಷೆಯಲ್ಲಿದ್ದ ಭಾರತೀಯರಿಗೆ ಟ್ರಂಪ್‌ ಸರ್ಕಾರ ತಣ್ಣೀರೆರಚಿದೆ.

ಅಮೆರಿದ ಶಾಶ್ವತ ಪೌರತ್ವಕ್ಕಾಗಿ ಗ್ರೀನ್‌ ಕಾರ್ಡ್‌ ಪಡೆಯುವ ನಿಟ್ಟಿನಲ್ಲಿ ಮಕ್ಕಳ ವಯಸ್ಸನ್ನು ಲೆಕ್ಕ ಹಾಕಲು ಅಮೆರಿಕದ ಪೌರತ್ವ ಹಾಗೂ ವಲಸೆ ನೀತಿ ಸೇವೆಗಳ ಇಲಾಖೆ ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿದೆ. ಹೊಸ ನೀತಿ ಪ್ರಕಾರ, ಮಕ್ಕಳ ಸ್ಥಿತಿ ಸಂರಕ್ಷಣಾ ಕಾಯಿದೆ  ಅನುಸಾರವೇ ಮಕ್ಕಳ ವಯಸ್ಸನ್ನು ಲೆಕ್ಕ ಹಾಕಬೇಕಾಗುತ್ತದೆ. ಪೋಷಕರು ಅರ್ಜಿ ಸಲ್ಲಿಸುವಾಗ ಮಕ್ಕಳಿಗೆ 21 ವರ್ಷ ದಾಟಿದ್ದರೆ, ಅವರು ಗ್ರೀನ್‌ ಕಾರ್ಡ್‌ಗೆ ಅನರ್ಹರಾಗಲಿದ್ದಾರೆ.

ಈಗಾಗಲೇ ಅರ್ಜಿ ಸಲ್ಲಿಸಿರುವವರಿಗೆ ಈ ನಿಯಮ ಅನ್ವಯವಾಗುವುದಿಲ್ಲ. ಆದರೆ ಆಗಸ್ಟ್‌ 15ರಿಂದ ಅರ್ಜಿ ಸಲ್ಲಿಕೆ ಸಂದರ್ಭದಲ್ಲಿ ಇದು ಕಟ್ಟುನಿಟ್ಟಾಗಿ ಅನ್ವಯವಾಗಲಿದೆ. ಆಗಸ್ಟ್ 8 ರಂದು ಈ ಹೊಸ ತಿದ್ದುಪಡಿಯನ್ನು ಹೊರಡಿಸಲಾಗಿದೆ.

2023ರಲ್ಲಿ ಜೋ ಬೈಡನ್‌ ಆಡಳಿತ ಹೊರಡಿಸಿದ ಮಾರ್ಗಸೂಚಿಗಳಲ್ಲಿ, ಪೋಷಕರು ಗ್ರೀನ್‌ಕಾರ್ಡ್‌ಗೆ ಅರ್ಜಿ ಸಲ್ಲಿಸುವಾಗ ಮಗುವಿನ ವಯಸ್ಸನ್ನು ಅಂತಿಮಗೊಳಿಸಿತ್ತು. ಕಾರ್ಡ್‌ ವಿತರಣೆ ಮಾಡುವ ತನಕ ಅದೇ ವಯೋಮಾನ ಚಾಲ್ತಿಯಲ್ಲಿರುತ್ತಿತ್ತು.

ವಲಸೆ ಸಂಸ್ಥೆಯಾದ ‘ಡೇವಿಸ್‌ ಅಸೋಸಿಯೇಟ್ಸ್‌’ನ ಮುಖ್ಯಸ್ಥೆ ಸುಕನ್ಯಾ ರಾಮನ್‌ ಈ ಬಗ್ಗೆ ತಿಳಿಸಿದ್ದು, ಅಮೆರಿಕದಲ್ಲಿ ನೆಲೆಸಿರುವ ಭಾರತೀಯ ವಲಸಿಗರಲ್ಲಿ ಆತಂಕ ಮನೆ ಮಾಡಿದೆ. ಅನೇಕರು ಗ್ರೀನ್‌ ಕಾರ್ಡ್‌ ಕಳೆದುಕೊಳ್ಳುವ ಅಪಾಯವಿದೆ. ಹೆಚ್ಚಿನ ಮಕ್ಕಳು 21 ವರ್ಷದ ವ್ಯಾಪ್ತಿಗೆ ಬರುವುದಿಲ್ಲ. ಆತಂಕಿತ ಪೋಷಕರು ವಲಸೆ ತಜ್ಞರಿಗೆ ಕರೆಗಳನ್ನು ಮಾಡುತ್ತಿದ್ದಾರೆ. ಅಂಥವರಿಗೆ ಕೆಲವು ಆಯ್ಕೆಗಳಿದ್ದು, ಆತಂಕ ಪಡುವ ಅಗತ್ಯವಿಲ್ಲ, ಎಂದು ಅವರು ತಿಳಿಸಿದ್ದಾರೆ.

ತಮ್ಮ ಅರ್ಜಿಗಳು ಮತ್ತು ಅಂತಿಮ ಕಟ್‌ ಆಫ್‌ ದಿನಾಂಕಗಳನ್ನು ಅವಲಂಬಿಸಿ, ಕೆಲವರು ಆಗಸ್ಟ್‌ 15 ರೊಳಗೆ ಗ್ರೀನ್‌ ಕಾರ್ಡ್‌ ಅರ್ಜಿಗಳನ್ನು ಸಲ್ಲಿಸಲು ಅರ್ಹರಾಗಬಹುದು. ಇದರಿಂದ ಮಕ್ಕಳ ವಯಸ್ಸು 21 ವರ್ಷ ತುಂಬುವ ಮೊದಲು ಲಾಕ್‌ಇನ್‌ ಮಾಡಬಹುದು. ಆದರೆ ಇತರರು ದೊಡ್ಡ ಸವಾಲನ್ನು ಎದುರಿಸಲೇಬೇಕಾಗುತ್ತದೆ.

ಒಂದು ವಾರಕ್ಕಿಂತ ಕಡಿಮೆ ಸಮಯ ಉಳಿದಿರುವುದರಿಂದ ಲಭ್ಯವಿರುವ ಪರ್ಯಾಯಗಳಲ್ಲಿ ಬಿ -5 ವೀಸಾಗೆ ತ್ವರಿತವಾಗಿ ಅರ್ಜಿ ಸಲ್ಲಿಸಬಹುದು. ಕೆಲವು ಕುಟುಂಬಗಳಿಗೆ ಅಮೆರಿಕದಲ್ಲಿ ಉಳಿಯುವ ಇಲ್ಲವೇ ತವರಿಗೆ ಮರಳುವ ಗೊಂದಲವಿದೆ. ಮಕ್ಕಳಲ್ಲಿ ಒಬ್ಬರು ಕಾನೂನುಬದ್ಧವಾಗಿ ಉಳಿಯಲು ಸಾಧ್ಯವಾಗದಿದ್ದರೆ ಅದು ಶಿಕ್ಷಣದ ಮೇಲೆ ಪರಿಣಾಮ ಬೀರುತ್ತದೆ. 2023ರ ದಾಖಲೆಗಳ ಪ್ರಕಾರ ಎಚ್‌-1ಬಿ ವೀಸಾ ಪಡೆದವರಲ್ಲಿ ಭಾರತೀಯರ ಸಂಖ್ಯೆ 70% ರಷ್ಟಿದೆ. ವೀಸಾ ಪರಿಷ್ಕರಣೆಯಲ್ಲಿ ಭಾರತೀಯರಿಗೆ ಹೆಚ್ಚು ಲಾಭವಾಗಲಿದೆ ಎಂದು ಅಂದಾಜಿಸಲಾಗಿದೆ.