ತಾಯಿ ಮೃತಪಟ್ಟಾಗ ಆಕೆಯ ಅಂತಿಮ ದರ್ಶನಕ್ಕೂ ಬರಲಾಗದೇ ವೀಡಿಯೋ ಕಾಲ್ನಲ್ಲೇ ಬಿಕ್ಕಳಿಸಿ ಅಳುತ್ತಿರುವ ಮಗನೊಬ್ಬನ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದ್ದು, ತೀವ್ರ ಚರ್ಚೆಗೆ ಕಾರಣವಾಗಿದೆ. ಮಕ್ಕಳಿಗೆ ಉತ್ತಮ ಶಿಕ್ಷಣ ನೀಡಿ, ಒಳ್ಳೆಯ ಭವಿಷ್ಯಕ್ಕಾಗಿ ಪೋಷಕರು ವಿದೇಶಗಳಿಗೆ ಕಳುಹಿಸುತ್ತಾರೆ. ಆದರೆ ಅದೇ ಮಕ್ಕಳು ತಾಯಿ ಮೃತಪಟ್ಟಾಗಲೂ ಬರಲಾಗದಷ್ಟು ಜೀವನದ ಒತ್ತಡ ಮತ್ತು ಅನಿವಾರ್ಯತೆಯಲ್ಲಿ ಸಿಲುಕಿರುವುದು ಈ ಘಟನೆಯ ಮೂಲಕ ಬೆಳಕಿಗೆ ಬಂದಿದೆ.
ಈ ಘಟನೆ ಎಲ್ಲಿ ಹಾಗೂ ಯಾವಾಗ ನಡೆದಿದೆ ಎಂಬ ಸ್ಪಷ್ಟ ಮಾಹಿತಿ ಲಭ್ಯವಿಲ್ಲ. ಆದರೂ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಡಿದ್ದು, ಇಂದಿನ ಬದಲಾಗುತ್ತಿರುವ ಜೀವನಶೈಲಿ ಮತ್ತು ವಲಸೆ ಜೀವನದ ಕಠಿಣ ವಾಸ್ತವದ ಬಗ್ಗೆ ಜನರನ್ನು ಚಿಂತನೆಗೆ ತಳ್ಳಿದೆ.
ವೀಡಿಯೋ ನೋಡಿದರೆ, ವಿದೇಶದಲ್ಲಿನ ಉದ್ಯೋಗದ ಅನಿವಾರ್ಯತೆಯಿಂದಾಗಿ ರಜೆ ಸಿಗದೇ ಈ ಯುವಕ ತಾಯಿಯ ಅಂತಿಮ ದರ್ಶನಕ್ಕೂ ಬರಲಾಗದ ಸ್ಥಿತಿ ನಿರ್ಮಾಣವಾಗಿದೆ ಎಂದು ಅಂದಾಜಿಸಲಾಗುತ್ತಿದೆ. ವೀಡಿಯೋದಲ್ಲಿ, ತಾಯಿಯ ಅಂತ್ಯಕ್ರಿಯೆ ನಡೆಯುವ ವೇಳೆ ಸಂಬಂಧಿಕರು ಫೋನ್ ಅನ್ನು ಹತ್ತಿರ ಹಿಡಿದಿರುವಾಗ, ವೀಡಿಯೋ ಕಾಲ್ ಮೂಲಕ ಯುವಕ ನಿರಂತರವಾಗಿ ಅಳುತ್ತಿರುವ ದೃಶ್ಯ ಕಾಣಿಸುತ್ತದೆ.
ಉತ್ತಮ ಉದ್ಯೋಗ ಹಾಗೂ ಕುಟುಂಬಕ್ಕೆ ಒಳ್ಳೆಯ ಬದುಕು ನೀಡಬೇಕೆಂಬ ಆಶಯದಿಂದ ಅನೇಕರು ವಿದೇಶಕ್ಕೆ ತೆರಳುತ್ತಾರೆ. ಸಣ್ಣಪುಟ್ಟ ಕೆಲಸವಾದರೂ ಸರಿ, ಉತ್ತಮ ಸಂಪಾದನೆ ಸಾಧ್ಯವೆಂಬ ನಂಬಿಕೆಯಿಂದ ಅವರು ತಮ್ಮ ನೆಲವನ್ನು ಬಿಟ್ಟು ದೂರದ ದೇಶಗಳಲ್ಲಿ ಜೀವನ ಸಾಗಿಸುತ್ತಾರೆ. ಆದರೆ ಆ ಆಯ್ಕೆಯ ಹಿಂದೆ ಇರುವ ವೈಯಕ್ತಿಕ ನೋವು, ತ್ಯಾಗ ಮತ್ತು ಸಂಕಟಗಳನ್ನು ಈ ವೀಡಿಯೋ ಸ್ಪಷ್ಟವಾಗಿ ತೋರಿಸಿದೆ. ವಿದೇಶದಲ್ಲಿ ಉತ್ತಮ ಜೀವನವನ್ನು ಬಯಸುವವರು ಪಾವತಿಸುವ ಭಾರೀ ಮಾನಸಿಕ ಬೆಲೆಯ ಪ್ರತಿಬಿಂಬವೇ ಈ ದೃಶ್ಯವಾಗಿದೆ.
ವೀಡಿಯೋ ನೋಡಿದ ಅನೇಕರು ಭಾವುಕ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. “ಇಂತಹ ಕೆಲಸ, ಇಂತಹ ಹಣ ಬೇಕಾ?” ಎಂದು ಪ್ರಶ್ನಿಸುವವರೂ ಇದ್ದಾರೆ. ಆದರೆ ಒಬ್ಬರು ಪ್ರತಿಕ್ರಿಯಿಸಿ, “ಅವನು ಭಾರತದಲ್ಲೇ ಉಳಿದು ನಿರುದ್ಯೋಗಿಯಾಗಿದ್ದರೆ ಇದೇ ಜನರು ‘ಇಂತಹ ಮಗನಿಂದ ಏನು ಪ್ರಯೋಜನ?’ ಎಂದು ಕೇಳುತ್ತಿದ್ದರು. ದೇವರು ಪ್ರತಿಯೊಬ್ಬರಿಗೂ ತನ್ನದೇ ಆದ ಹಣೆಬರಹ ಮತ್ತು ಪರೀಕ್ಷೆಯನ್ನು ನೀಡುತ್ತಾನೆ. ಇದು ಅವನ ಪಾಲಿನ ಪರೀಕ್ಷೆ. ಅವನು ತನ್ನ ಹೆತ್ತವರನ್ನು ಪ್ರೀತಿಸುವ ಮಗನೇ. ಸಾಧ್ಯವಿದ್ದರೆ ಏಳು ಸಮುದ್ರ ದಾಟಿ ಓಡಿಬರುತ್ತಿದ್ದ. ವಿದೇಶದಲ್ಲಿರುವವರು ತಂದೆಯಂತೆ ತ್ಯಾಗ ಮಾಡುವವರು; ಕುಟುಂಬಕ್ಕೆ ಆಧಾರವಾಗಬೇಕೆಂಬ ಉದ್ದೇಶದಿಂದ ದೂರ ಉಳಿಯುವವರು” ಎಂದು ಹೇಳಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿದ ಮತ್ತೊಬ್ಬರು, “ಕೊನೆಗೂ ಯಾರೋ ವಾಸ್ತವವನ್ನು ಹೇಳಿದರು. ಭಾರತದಲ್ಲಿ ತಿಂಗಳಿಗೆ 15–20 ಸಾವಿರ ರೂಪಾಯಿ ಗಳಿಸಿದರೆ ಕುಟುಂಬ ನಿರ್ವಹಣೆ ಕಷ್ಟ. ಎಲ್ಲರೂ ವ್ಯಾಪಾರ ಅಥವಾ ದೊಡ್ಡ ಉದ್ಯೋಗದಲ್ಲಿ ಯಶಸ್ವಿಯಾಗಲು ಸಾಧ್ಯವಿಲ್ಲ. ಆದ್ದರಿಂದ ವಿದೇಶಕ್ಕೆ ಹೋಗಿ ಸಂಪಾದಿಸಿ ಕುಟುಂಬಕ್ಕೆ ಹಣ ಕಳುಹಿಸುವುದು ಅನೇಕ ಜನರಿಗೆ ಕೊನೆಯ ಆಯ್ಕೆಯಾಗುತ್ತದೆ” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇನ್ನೊಬ್ಬರು, “ಜನರು ಒಂದೇ ವೀಡಿಯೋ ನೋಡಿ ಎಲ್ಲವನ್ನೂ ತೀರ್ಮಾನಿಸುತ್ತಾರೆ. ನಾನು ಕೂಡ ಇದೇ ರೀತಿಯ ಪರಿಸ್ಥಿತಿಯನ್ನು ಎದುರಿಸಿದ್ದೇನೆ. ನನ್ನ ಅಜ್ಜ–ಅಜ್ಜಿಯನ್ನು ಕಳೆದುಕೊಂಡಿದ್ದೇನೆ. ಯಾರೂ ಇಂತಹ ನೋವನ್ನು ಅನುಭವಿಸಬಾರದು” ಎಂದು ಹೇಳಿದ್ದಾರೆ.
ಪಂಜಾಬ್, ಹರ್ಯಾಣ ಮುಂತಾದ ರಾಜ್ಯಗಳಲ್ಲಿ ವಿದೇಶಕ್ಕೆ ಹೋಗುವುದು ಒಂದು ರೀತಿಯ ಫ್ಯಾಷನ್ ಆಗಿದೆ. ಹೆಚ್ಚಿನ ವಿದ್ಯಾರ್ಹತೆ ಇಲ್ಲದವರೂ ಉದ್ಯೋಗಕ್ಕಾಗಿ ವಿದೇಶಕ್ಕೆ ತೆರಳಿ, ಅಲ್ಲಿ ಸಣ್ಣಪುಟ್ಟ ಕೆಲಸಗಳನ್ನು ಮಾಡಿಕೊಂಡು ಉತ್ತಮ ಹಣ ಸಂಪಾದಿಸುತ್ತಿರುವ ಉದಾಹರಣೆಗಳು ಸಾಕಷ್ಟಿವೆ. ಈ ವೀಡಿಯೋ ಆಧುನಿಕ ವಲಸೆ ಜೀವನದ ಕಠಿಣ ಸತ್ಯವನ್ನು ಮತ್ತೆ ಒಮ್ಮೆ ಸಮಾಜದ ಮುಂದೆ ಇಟ್ಟಿದೆ.
