ಸಾಲಗಾರ ಸತ್ತರೆ ಆ ಸಾಲದ ಪಾವತಿ ಯಾರು ಮಾಡಬೇಕು? ಬ್ಯಾಂಕ್ ನಿಯಮ ಏನು ಹೇಳುತ್ತದೆ?..

ಈ ದಿನಗಳಲ್ಲಿ ಮನೆ, ವಾಹನ ಅಥವಾ ಇತರ ಅಗತ್ಯಗಳಿಗಾಗಿ ಸಾಲ ಪಡೆಯುವುದು ತುಂಬಾ ಸಾಮಾನ್ಯವಾಗಿದೆ. ಆದರೆ ಸಾಲಗಾರ ಮರಣಹೊಂದಿದರೆ ಆ ಸಾಲದ ಪಾವತಿಯನ್ನು ಯಾರು ಮಾಡಬೇಕು ಎಂಬ ಪ್ರಶ್ನೆ ಅನೇಕ ಕುಟುಂಬಗಳಲ್ಲಿ ಗೊಂದಲ ಉಂಟುಮಾಡುತ್ತದೆ. ಈ ಸಂದರ್ಭದಲ್ಲಿ ಬ್ಯಾಂಕುಗಳು ನಿಗದಿತ ನಿಯಮಗಳ ಪ್ರಕಾರ ಕ್ರಮ ಕೈಗೊಳ್ಳುತ್ತವೆ.

ಮೊದಲ ಹಂತದಲ್ಲಿ ಬ್ಯಾಂಕ್ ಸಾಲದ ಸಹ-ಅರ್ಜಿದಾರರನ್ನು ಸಂಪರ್ಕಿಸುತ್ತದೆ. ಸಹ-ಅರ್ಜಿದಾರರ ಹೆಸರಿನಲ್ಲಿ ಗೃಹ ಸಾಲ ಅಥವಾ ಶಿಕ್ಷಣ ಸಾಲ ಇದ್ದರೆ, ಸಾಲಗಾರ ಸಾವಿಗೀಡಾದರೂ ಸಾಲ ಮರುಪಾವತಿಸುವ ಜವಾಬ್ದಾರಿ ಅವರ ಮೇಲೇ ಇರುತ್ತದೆ. ಬ್ಯಾಂಕ್ ಅವರಿಗೆ ಪಾವತಿ ಮುಂದುವರಿಸಲು ಸೂಚಿಸುತ್ತದೆ.

ಸಹ-ಅರ್ಜಿದಾರರು ಸಾಲ ಪಾವತಿಸಲು ಅಸಮರ್ಥರಾಗಿದ್ದರೆ, ಬ್ಯಾಂಕ್ ಖಾತರಿದಾರರನ್ನು ಸಂಪರ್ಕಿಸುತ್ತದೆ. ಸಾಲ ನೀಡುವ ವೇಳೆ ಖಾತರಿದಾರರು ನೀಡಿದ ಖಾತರಿ ಕಾನೂನುಬದ್ಧವಾಗಿರುವುದರಿಂದ, ಬ್ಯಾಂಕ್ ಅವರಿಗೆ ಸಾಲ ಮರುಪಾವತಿಸಲು ಕಾನೂನು ಕ್ರಮದ ಮೂಲಕ ಒತ್ತಾಯಿಸಬಹುದು.

ಸಹ-ಅರ್ಜಿದಾರರೂ ಖಾತರಿದಾರರೂ ಸಾಲ ಪಾವತಿಸಲು ಸಮ್ಮತಿಸದಿದ್ದರೆ, ಬ್ಯಾಂಕ್ ಮೃತರ ಕಾನೂನುಬದ್ಧ ವಾರಸುದಾರರನ್ನು ಸಂಪರ್ಕಿಸುತ್ತದೆ. ಇದರಲ್ಲಿ ಪತ್ನಿ, ಮಕ್ಕಳು ಅಥವಾ ಪೋಷಕರು ಸೇರಿರಬಹುದು. ಅವರಿಗೆ ನೋಟಿಸ್‌ಗಳು ಮತ್ತು ಜ್ಞಾಪನೆಗಳನ್ನು ಕಳುಹಿಸಿ ಸಾಲದ ಬಾಕಿ ಮೊತ್ತವನ್ನು ವಸೂಲು ಮಾಡುವ ಪ್ರಯತ್ನ ನಡೆಯುತ್ತದೆ.

ಯಾರೂ ಸಾಲ ಮರುಪಾವತಿಸಲು ಮುಂದೆ ಬರದಿದ್ದರೆ, ಬ್ಯಾಂಕ್ ಮೃತರ ಆಸ್ತಿಯನ್ನು ಸ್ವಾಧೀನಪಡಿಸಿಕೊಳ್ಳುತ್ತದೆ. ಗೃಹ ಸಾಲದ ಸಂದರ್ಭಗಳಲ್ಲಿ, ಬ್ಯಾಂಕ್ ಮನೆ ಅಥವಾ ಫ್ಲಾಟ್‌ನ್ನು ಹರಾಜು ಮಾಡುತ್ತದೆ. ವಾಹನ ಸಾಲದಂತು ವಾಹನವನ್ನು ವಶಪಡಿಸಿಕೊಂಡು ಮಾರಾಟ ಮಾಡಲಾಗುತ್ತದೆ.

ವೈಯಕ್ತಿಕ ಸಾಲಗಳು ಸಾಮಾನ್ಯವಾಗಿ ಅಸುರಕ್ಷಿತವಾಗಿರುತ್ತವೆ. ಇಂತಹ ಸಾಲಗಳಲ್ಲಿ ಯಾವುದೇ ಆಸ್ತಿ ಒತ್ತೆಯಾಗಿರುವುದಿಲ್ಲ. ಹೀಗಾಗಿ ಉತ್ತರಾಧಿಕಾರಿಗಳು ಪಾವತಿಸಲು ನಿರಾಕರಿಸಿದರೆ, ಬ್ಯಾಂಕ್ ಆ ಸಾಲವನ್ನು ಅನುತ್ಪಾದಕ ಆಸ್ತಿಯಾಗಿ ಘೋಷಿಸಿ ಬಿಟ್ಟುಬಿಡುತ್ತದೆ.

ಆದರೆ ಸಾಲ ಪಡೆಯುವ ಸಮಯದಲ್ಲೇ ಸಾಲ ವಿಮೆ ಮಾಡಿಕೊಂಡಿದ್ದರೆ, ಸಾಲಗಾರನ ಮರಣದ ಬಳಿಕ ವಿಮಾ ಕಂಪನಿಯೇ ಸಂಪೂರ್ಣ ಸಾಲದ ಮೊತ್ತವನ್ನು ಬ್ಯಾಂಕಿಗೆ ಪಾವತಿಸುತ್ತದೆ. ಇದರಿಂದ ಕುಟುಂಬದ ಮೇಲೆ ಯಾವುದೇ ಬಡ್ಡಿ ಅಥವಾ ಸಾಲದ ಹೊಣೆ ಬರುವುದಿಲ್ಲ. ಈ ಕಾರಣಕ್ಕೆ ಸಾಲ ವಿಮೆ ಮಾಡಿಸಿಕೊಳ್ಳುವುದು ಅತ್ಯಂತ ಸುರಕ್ಷಿತ ಕ್ರಮವಾಗಿದೆ.