ಭಾರತದ ಅತ್ಯಂತ ಸವಾಲಿನ ಪರೀಕ್ಷೆಗಳಲ್ಲಿ ಒಂದಾಗಿರುವ ಐಐಟಿ–ಜೆಇಇಯಲ್ಲಿ ಸಂಪೂರ್ಣ ಅಂಕಗಳನ್ನು ಪಡೆಯುವುದು ಕನಸಿನಂತೆಯೇ ಎಂದು ಹಲವರು ನಂಬುತ್ತಾರೆ. ಆದರೆ ಉದಯಪುರದ ಮಧ್ಯಮ ವರ್ಗದ ಕುಟುಂಬದಿಂದ ಬಂದ ಕಲ್ಪಿತ್ ವೀರ್ವಾಲ್ 2017ರಲ್ಲಿ 360ಕ್ಕೆ 360 ಅಂಕಗಳನ್ನು ಗಳಿಸಿ ಆ ನಂಬಿಕೆಯನ್ನು ಮುರಿದಿದ್ದರು.
ಅಖಿಲ ಭಾರತ ಮಟ್ಟದಲ್ಲಿ ಮೊದಲ ಸ್ಥಾನ (AIR-1) ಪಡೆದು, ಅವರು ಐಐಟಿ ಬಾಂಬೆಯಲ್ಲಿ ಕಂಪ್ಯೂಟರ್ ಸೈನ್ಸ್ ಪ್ರವೇಶ ಪಡೆದರೂ ಮುಂದಿನ ದಿನಗಳಲ್ಲಿ ಎಲ್ಲರನ್ನೂ ಅಚ್ಚರಿ ಮೂಡಿಸುವ ತೀರ್ಮಾನಗಳನ್ನು ಕೈಗೊಂಡರು.
ಇದನ್ನು ಓದಿ: ವೈದ್ಯರ ಬಿಳಿ ಕೋಟ್, ವಕೀಲರ ಕಪ್ಪು ಕೋಟ್: ಬಣ್ಣಗಳ ಹಿಂದೆ ಇರುವ ಅರ್ಥ, ಇತಿಹಾಸ ಮತ್ತು ವಿಜ್ಞಾನ ಏನು ಗೋತ್ತಾ?
ಇದನ್ನು ಓದಿ: ರಾಯಚೂರು: ಹಣದ ಬೇಡಿಕೆಗೆ ಹೆತ್ತ ತಾಯಿಯನ್ನೇ ಬರ್ಬರವಾಗಿ ಕೊಂದ ಪಾಪಿ ಪುತ್ರ!!!!
ಯಶಸ್ಸು ಅಂದರೆ ದಿನಕ್ಕೆ 15 ಗಂಟೆಗಳ ಓದು ಅಥವಾ ಕೋಟಾದಂತಹ ಕೋಚಿಂಗ್ ಕೇಂದ್ರಗಳ ಅವಲಂಬನೆ ಎನ್ನುವ ಭಾವನೆಗೆ ಕಲ್ಪಿತ್ ತೀವ್ರ ವಿರೋಧ ವ್ಯಕ್ತಪಡಿಸಿದರು. ಸರ್ಕಾರಿ ಆಸ್ಪತ್ರೆಯಲ್ಲಿ ಕಂಪೌಂಡರ್ ಆಗಿದ್ದ ತಂದೆ ಮತ್ತು ಶಿಕ್ಷಕಿಯಾದ ತಾಯಿಯ ಬೆಂಬಲದೊಂದಿಗೆ ತಮ್ಮ ಊರಿನಲ್ಲೇ ಓದುತ್ತಾ, ವಿಷಯವನ್ನು ಆಳವಾಗಿ ಅರ್ಥಮಾಡಿಕೊಳ್ಳುವುದೇ ಮುಖ್ಯ ಎಂಬುದನ್ನು ಅವರು ಸಾಬೀತುಪಡಿಸಿದರು. ಜೆಇಇ ಜೊತೆಗೆ ಕೆವಿಪಿವೈ ಹಾಗೂ ಎನ್ಟಿಎಸ್ಇ ವಿದ್ಯಾರ್ಥಿವೇತನಗಳನ್ನೂ ಅವರು ತಮ್ಮದಾಗಿಸಿಕೊಂಡಿದ್ದರು.
ಐಐಟಿ ಬಾಂಬೆಯಲ್ಲಿ ಓದುತ್ತಿದ್ದ ಸಮಯದಲ್ಲಿ ಕಲ್ಪಿತ್ ಅವರಿಗೆ ಲಕ್ಷಾಂತರ ಸಂಬಳದ ಉದ್ಯೋಗಾವಕಾಶಗಳು ಲಭ್ಯವಿದ್ದವು. ಆದರೂ ಕಾರ್ಪೊರೇಟ್ ಜೀವನದತ್ತ ಹೋಗುವ ಆಸಕ್ತಿ ಅವರಿಗೆ ಇರಲಿಲ್ಲ. ಎರಡನೇ ವರ್ಷದಲ್ಲೇ ಜೆಇಇಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡಲು ಯೂಟ್ಯೂಬ್ ಚಾನೆಲ್ ಆರಂಭಿಸಿದರು. ಆ ಪ್ರಯತ್ನ ಅಷ್ಟೊಂದು ಯಶಸ್ಸು ಕಂಡಿತು ಎಂದರೆ, ಅವರ ಮೊದಲ ಆನ್ಲೈನ್ ಕೋರ್ಸ್ನಿಂದ ಬಂದ ಆದಾಯವೇ ಐಐಟಿ ಕ್ಯಾಂಪಸ್ನಲ್ಲಿ ದೊರಕುವ ಗರಿಷ್ಠ ಪ್ಯಾಕೇಜ್ಗಿಂತ ಹೆಚ್ಚಾಗಿತ್ತು.
ತಮ್ಮ ಸ್ಟಾರ್ಟ್ಅಪ್ ‘ಅಕಾಡ್ ಬೂಸ್ಟ್’ ಅನ್ನು ಸಂಪೂರ್ಣವಾಗಿ ಬೆಳೆಸುವ ಉದ್ದೇಶದಿಂದ, ಕೊನೆಯ ಸೆಮಿಸ್ಟರ್ ಬಾಕಿ ಇರುವಾಗಲೇ ಅವರು ಐಐಟಿ ಬಾಂಬೆಯಿಂದ ಹೊರಬಂದರು. ಕ್ಯಾಂಪಸ್ ಪ್ಲೇಸ್ಮೆಂಟ್ ಪ್ರಕ್ರಿಯೆಗಳಲ್ಲಿ ಭಾಗವಹಿಸದೇ, ಸಂಪೂರ್ಣವಾಗಿ ಉದ್ಯಮಿಯಾಗಿ ತಮ್ಮನ್ನು ತಾವು ರೂಪಿಸಿಕೊಂಡರು. ಇಂದು ಈ ಸಂಸ್ಥೆ ಲಾಭದಾಯಕವಾಗಿದ್ದು, ದೊಡ್ಡ ಹೂಡಿಕೆ ಆಫರ್ಗಳು ಬಂದರೂ ಸಹ ಕಲ್ಪಿತ್ ಅದನ್ನು ಸ್ವತಂತ್ರವಾಗಿ ಮುಂದುವರಿಸುತ್ತಿದ್ದಾರೆ.
ವಿದ್ಯಾರ್ಥಿಗಳ ಮಾನಸಿಕ ಆರೋಗ್ಯದ ಕುರಿತು ಸದಾ ಕಾಳಜಿ ಹೊಂದಿರುವ ಕಲ್ಪಿತ್, ಓದಿನ ಒತ್ತಡದಲ್ಲಿರುವ ಯುವಕರಿಗೆ ಸಮಾಧಾನದ ಮಾತುಗಳನ್ನು ಹೇಳುತ್ತಾ ಬರುತ್ತಾರೆ. ಇತ್ತೀಚೆಗೆ ವೈರಲ್ ಆದ ಅತಿಯಾದ ಓದಿನ ವೇಳಾಪಟ್ಟಿಗಳನ್ನು ಟೀಕಿಸಿದ ಅವರು, “ನಾನು ಪೂರ್ಣ ಅಂಕಗಳನ್ನು ಪಡೆದಿದ್ದರೂ ಇಷ್ಟೊಂದು ಗಂಟೆ ಓದಿಲ್ಲ. ಆರೋಗ್ಯ ಮತ್ತು ಮನಸ್ಸಿನ ಮೇಲೆ ಅತಿಯಾದ ಒತ್ತಡ ಹೇರಿಕೊಡುವುದು ಅಪಾಯಕಾರಿ” ಎಂದು ಎಚ್ಚರಿಸಿದರು. ಕೇವಲ ಅಂಕಗಳ ಹಿಂದೆ ಓಡುವುದೇ ಜೀವನವಲ್ಲ, ಸರಿಯಾದ ಯೋಜನೆ ಮತ್ತು ನಿರ್ಧಾರಗಳೇ ನಿಜವಾದ ಯಶಸ್ಸಿನ ದಾರಿ ಎಂಬುದನ್ನು ಕಲ್ಪಿತ್ ವೀರ್ವಾಲ್ ಅವರ ಜೀವನವೇ ಸ್ಪಷ್ಟವಾಗಿ ತೋರಿಸುತ್ತದೆ.
