ಹೇರ್ ಸ್ಟ್ರೈಟ್‌ನಿಂಗ್‌ಗೆ ಹೋದ ಬಾಲಕಿಗೆ ಕಿಡ್ನಿ ಫೇಲ್ಯೂರ್!

ಕೂದಲು ಸುಂದರವಾಗಿ, ನೇರವಾಗಿ ಕಾಣಬೇಕೆಂಬ ಆಸೆಯಿಂದ ಅನೇಕ ಯುವತಿಯರು ಹೇರ್ ಸ್ಟ್ರೈಟ್‌ನಿಂಗ್ ಚಿಕಿತ್ಸೆಗೆ ಮೊರೆ ಹೋಗುತ್ತಾರೆ. ಆದರೆ ಈ ಸೌಂದರ್ಯ ಚಿಕಿತ್ಸೆಯೇ ಜೀವಕ್ಕೆ ಅಪಾಯ ತರಬಹುದು ಎಂಬುದಕ್ಕೆ ಇಸ್ರೇಲ್‌ನಲ್ಲಿ ನಡೆದ ಘಟನೆಯೊಂದು ಬೆಚ್ಚಿಬೀಳಿಸುವ ಉದಾಹರಣೆಯಾಗಿದೆ.

ಇದನ್ನು ಓದಿ: ನಿಜವಾಗಿ ಧ್ಯಾನ ಮಾಡುವುದು ಹೇಗೆ ಗೊತ್ತಾ..!

ಇದನ್ನು ಓದಿ: ಅಸಲಿ ಚಿನ್ನವನ್ನೇ ಮರುಳುಮಾಡುವ ಬಾಂಗ್ಲಾ ಫೇಕ್ ಗೋಲ್ಡ್! ನೀವು ಖರೀದಿಸುತ್ತಿರುವ ಚಿನ್ನ ನಿಜವಾಗಿಯೂ ಅಸಲೆಯೇ?

ಇಸ್ರೇಲ್‌ನ ಜೆರುಸಲೆಮ್‌ನಲ್ಲಿರುವ ಶಾರೆ ಜೆಡೆಕ್ ವೈದ್ಯಕೀಯ ಕೇಂದ್ರ (Shaare Zedek Medical Center) ನೀಡಿರುವ ಮಾಹಿತಿಯ ಪ್ರಕಾರ, 17 ವರ್ಷದ ಬಾಲಕಿಯೊಬ್ಬಳು ಹೇರ್ ಸ್ಟ್ರೈಟ್‌ನಿಂಗ್ ಚಿಕಿತ್ಸೆ ಪಡೆದ ಬಳಿಕ ತೀವ್ರ ಕಿಡ್ನಿ ಫೇಲ್ಯೂರ್‌ಗೆ ಒಳಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದಾಳೆ. ಈ ಘಟನೆ ಕೇಳಿ ವೈದ್ಯರೂ ಕೂಡ ಅಚ್ಚರಿಗೊಂಡಿದ್ದಾರೆ.

ಒಂದಲ್ಲ, ಎರಡಲ್ಲ – ಮತ್ತೊಂದು ಪ್ರಕರಣವೂ ದಾಖಲು

ಇದೊಂದೇ ಅಲ್ಲ. ಕೇವಲ ಒಂದು ತಿಂಗಳ ಹಿಂದಷ್ಟೇ, 25 ವರ್ಷದ ಮತ್ತೊಬ್ಬ ಮಹಿಳೆಯೂ ಹೇರ್ ಸ್ಟ್ರೈಟ್‌ನಿಂಗ್ ಚಿಕಿತ್ಸೆಯ ಬಳಿಕ ಮೂತ್ರಪಿಂಡ ವೈಫಲ್ಯದಿಂದ ಬಳಲುತ್ತಿದ್ದರು ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ. ಎರಡೂ ಪ್ರಕರಣಗಳು ಒಂದೇ ರೀತಿಯ ಸೌಂದರ್ಯ ಚಿಕಿತ್ಸೆಯ ನಂತರ ಸಂಭವಿಸಿರುವುದು ಆತಂಕಕ್ಕೆ ಕಾರಣವಾಗಿದೆ.

ಚಿಕಿತ್ಸೆ ಮುಂದುವರಿದಿದೆ

ಹೇರ್ ಸ್ಟ್ರೈಟ್‌ನಿಂಗ್ ನಂತರ ಬಾಲಕಿಗೆ ವಾಂತಿ, ತಲೆತಿರುಗುವಿಕೆ ಹಾಗೂ ತೀವ್ರ ತಲೆನೋವು ಕಾಣಿಸಿಕೊಂಡಿತ್ತು. ಸ್ಥಿತಿ ಗಂಭೀರವಾಗಿದ್ದರಿಂದ, ಅವಳಿಗೆ ಹಲವು ದಿನಗಳ ಕಾಲ ಮಕ್ಕಳ ವಿಭಾಗದಲ್ಲಿ ಚಿಕಿತ್ಸೆ ನೀಡಲಾಯಿತು. ಕಳೆದ ಸೋಮವಾರ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಲಾಗಿದ್ದು, ಸದ್ಯ ಹೊರರೋಗಿಗಳ ವಿಭಾಗದಲ್ಲಿ ಚಿಕಿತ್ಸೆ ಮುಂದುವರಿದಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

26 ಮಹಿಳೆಯರ ಪ್ರಕರಣಗಳು ದಾಖಲು

ಈ ಘಟನೆಗಳು ಒಂಟಿಯಾಗಿಲ್ಲ. 2023ರಲ್ಲಿ ಶಾರೆ ಜೆಡೆಕ್ ಆಸ್ಪತ್ರೆಯ ನೆಫ್ರಾಲಜಿ ವಿಭಾಗದ ಮುಖ್ಯಸ್ಥೆ ಪ್ರೊಫೆಸರ್ ಲಿಂಡಾ ಶವಿತ್ ಮತ್ತು ವೈದ್ಯ ಡಾ. ಅಲೋನ್ ಬೆನಾಯಾ ಪ್ರಕಟಿಸಿದ ಅಧ್ಯಯನದಲ್ಲಿ, ದೇಶಾದ್ಯಂತ ತುರ್ತು ವಿಭಾಗಗಳಿಗೆ ದಾಖಲಾಗಿದ್ದ 14 ರಿಂದ 58 ವರ್ಷ ವಯಸ್ಸಿನ 26 ಮಹಿಳೆಯರ ತೀವ್ರ ಮೂತ್ರಪಿಂಡ ವೈಫಲ್ಯದ ಪ್ರಕರಣಗಳು ದಾಖಲಾಗಿವೆ.

ಈ ಎಲ್ಲ ಮಹಿಳೆಯರೂ ಗ್ಲೈಆಕ್ಸಿಲಿಕ್ ಆಸಿಡ್ (Glyoxylic Acid) ಹೊಂದಿರುವ ಹೇರ್ ಸ್ಟ್ರೈಟ್‌ನಿಂಗ್ ಉತ್ಪನ್ನಗಳನ್ನು ಬಳಸಿದ್ದವು ಎಂದು ಸಂಶೋಧಕರು ಪತ್ತೆಹಚ್ಚಿದ್ದಾರೆ.

ಸರ್ಕಾರದಿಂದ ಕಠಿಣ ಕ್ರಮ

ಈ ವರದಿಗಳ ಹಿನ್ನೆಲೆಯಲ್ಲಿ, ಆರೋಗ್ಯ ಸಚಿವಾಲಯವು ಗ್ಲೈಆಕ್ಸಿಲಿಕ್ ಆಸಿಡ್ ಹೊಂದಿರುವ ಡಜನ್‌ಗಟ್ಟಲೆ ಸೌಂದರ್ಯವರ್ಧಕ ಉತ್ಪನ್ನಗಳ ಪರವಾನಗಿಯನ್ನು ರದ್ದುಗೊಳಿಸಿದೆ. ಸಾರ್ವಜನಿಕ ಆರೋಗ್ಯದ ದೃಷ್ಟಿಯಿಂದ ಈ ಕ್ರಮ ಅತ್ಯಗತ್ಯ ಎಂದು ಹೇಳಲಾಗಿದೆ.

ವೈದ್ಯರ ಎಚ್ಚರಿಕೆ

ಪ್ರೊಫೆಸರ್ ಲಿಂಡಾ ಶವಿತ್ ಅವರು,

“ಹೇರ್ ಸ್ಟ್ರೈಟ್‌ನಿಂಗ್ ಉತ್ಪನ್ನಗಳನ್ನು ನೇರವಾಗಿ ನೆತ್ತಿ ಅಥವಾ ಕೂದಲಿನ ಬೇರುಗಳಿಗೆ ಹಚ್ಚಬಾರದು. ಕನಿಷ್ಠ 1.5 ಸೆಂಟಿಮೀಟರ್ ದೂರ ಇಟ್ಟು ಮಾತ್ರ ಹಚ್ಚಬೇಕು,” ಎಂದು ಎಚ್ಚರಿಸಿದ್ದಾರೆ.

ಇದಕ್ಕುಡವಾಗಿ, ಕೇಶ ವಿನ್ಯಾಸಕರು ಹಾಗೂ ಗ್ರಾಹಕರು ಉತ್ಪನ್ನವನ್ನು ಬಿಸಿ ಮಾಡುವಾಗ ವಿಶೇಷ ಎಚ್ಚರಿಕೆ ವಹಿಸಬೇಕು. ತಯಾರಕರು ನೀಡಿರುವ ಸೂಚನೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು ಅತ್ಯಂತ ಅಗತ್ಯ ಎಂದು ವೈದ್ಯರು ತಿಳಿಸಿದ್ದಾರೆ.

ಸುಂದರತೆಗಿಂತ ಆರೋಗ್ಯ ಮುಖ್ಯ

ಕೂದಲು ಸುಂದರವಾಗಿ ಕಾಣಬೇಕೆಂಬ ಆಸೆ ಸಹಜವಾದದ್ದೇ. ಆದರೆ ಅದಕ್ಕಾಗಿ ಆರೋಗ್ಯವನ್ನು ಅಪಾಯಕ್ಕೆ ಒಡ್ಡುವುದು ಸರಿಯಲ್ಲ. ಈ ಘಟನೆ, ಹೇರ್ ಸ್ಟ್ರೈಟ್‌ನಿಂಗ್ ಸೇರಿದಂತೆ ಯಾವುದೇ ಸೌಂದರ್ಯ ಚಿಕಿತ್ಸೆಗೆ ಮುನ್ನ ಅದರ ಅಪಾಯಗಳನ್ನು ಅರಿತುಕೊಳ್ಳುವುದು ಎಷ್ಟು ಮುಖ್ಯ ಎಂಬುದಕ್ಕೆ ಗಂಭೀರ ಎಚ್ಚರಿಕೆಯಾಗಿದೆ.