ಸಾಮಾನ್ಯವಾಗಿ ಜನರು ನಿವೃತ್ತಿಯಾಗಿ ಆರಾಮದಾಯಕ ಜೀವನ ನಡೆಸುವ ವಯಸ್ಸಿನಲ್ಲಿ, ಮಹಾರಾಷ್ಟ್ರದ ಜಲಗಾಂವ್ ಜಿಲ್ಲೆಯ ನಾಶಿರಾಬಾದ್ ನಗರಪಾಲಿಕೆ ಚುನಾವಣೆಯಲ್ಲಿ 77 ವರ್ಷದ ಜನಾಬಾಯಿ ರಾಂಧೆ ಗೆಲುವು ಸಾಧಿಸಿದ್ದಾರೆ. ಸುಡುವ ಬಿಸಿಲಿನ ನಡುವೆಯೂ ಚಪ್ಪಲಿ ಧರಿಸದೆ ಮನೆ ಮನೆಗೆ ತೆರಳಿ ಪ್ರಚಾರ ನಡೆಸಿದ ಅವರು ಕಾರ್ಪೊರೇಟರ್ ಹುದ್ದೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಕಾಲಿಗೆ ಚಪ್ಪಲಿಯೂ ಇಲ್ಲ, ಕೈಯಲ್ಲಿ ಕೋಲೂ ಇಲ್ಲದಿದ್ದರೂ ಜನಾಬಾಯಿ ಅವರ ಉತ್ಸಾಹ ಮತ್ತು ಶಕ್ತಿ ಯುವಕರನ್ನೇ ನಾಚಿಕೆಪಡಿಸುವಂತಿತ್ತು. ನಿವೃತ್ತಿ ಜೀವನದ ಹಾದಿಯನ್ನು ಆರಿಸಿಕೊಳ್ಳುವ ಈ ವಯಸ್ಸಿನಲ್ಲಿ ಸಾರ್ವಜನಿಕ ಪ್ರತಿನಿಧಿಯಾಗಿ ಜವಾಬ್ದಾರಿಯನ್ನು ಹೊತ್ತುಕೊಂಡಿರುವ ಅವರು ಯುವ ಪೀಳಿಗೆಗೆ ಸ್ಪೂರ್ತಿಯ ಸಂಕೇತವಾಗಿದ್ದಾರೆ.
ಚುನಾವಣೆಯಲ್ಲಿ ಗೆದ್ದ ಬಳಿಕ ನಗರಸಭೆ ಆವರಣವನ್ನು ಪ್ರವೇಶಿಸಿದ ಜನಾಬಾಯಿ ಭಾವುಕರಾದರು. ತಮ್ಮ ಕಾರ್ಯಕರ್ತರು ಮತ್ತು ಆಪ್ತರನ್ನು ಅಪ್ಪಿಕೊಂಡ ಕ್ಷಣದಲ್ಲಿ ಅವರ ಕಣ್ಣಲ್ಲಿ ಸಂತೋಷದ ಕಣ್ಣೀರು ಹರಿಯಿತು. ಈ ದೃಶ್ಯವನ್ನು ಕಂಡ ಹಲವರು ಸಹ ಭಾವೋದ್ರಿಕ್ತರಾದರು.
ಜನಾಬಾಯಿ ರಾಂಧೆ ಅವರ ಈ ಗೆಲುವು ದೃಢಸಂಕಲ್ಪ ಮತ್ತು ಅಚಲ ನಂಬಿಕೆಯ ವಿಜಯವೆಂದು ಪರಿಗಣಿಸಲಾಗಿದೆ. ಜೀವನದ ಈ ಹಂತದಲ್ಲಿಯೂ ಸಮಾಜಕ್ಕಾಗಿ ಏನಾದರೂ ಮಾಡಬೇಕೆಂಬ ಅವರ ಸಂಕಲ್ಪ ಅನೇಕರಿಗೆ ಪ್ರೇರಣೆಯಾಗಿದೆ.
ಬಿಜೆಪಿ ಪಕ್ಷದ ಪರವಾಗಿ ಸ್ಪರ್ಧಿಸಿದ್ದ ಜನಾಬಾಯಿ ರಾಂಧೆ ನಾಶಿರಾಬಾದ್ನ ವಾರ್ಡ್ ಸಂಖ್ಯೆ 7ಎಯಿಂದ ಜಯಗಳಿಸಿದ್ದಾರೆ. ಎಣಿಕೆ ಕೇಂದ್ರದಲ್ಲಿ ತಮ್ಮ ಗೆಲುವಿನ ಘೋಷಣೆ ಕೇಳಿದಾಗ ಅವರು ಆನಂದದ ಕಣ್ಣೀರು ಸುರಿಸಿದರು. 77 ವರ್ಷದ ವಯಸ್ಸಿನಲ್ಲಿ ಮೊದಲ ಬಾರಿಗೆ ಚುನಾವಣಾ ಅಖಾಡಕ್ಕೆ ಇಳಿದು ಗೆದ್ದಿರುವುದು ವಿಶೇಷವಾಗಿದ್ದು, ಈ ಸಾಧನೆ ಎಲ್ಲರ ಗಮನ ಸೆಳೆದಿದೆ.
