ಅಖಿಲೇಶ್ ಯಾದವ್ ಕಾರಿಗೆ 8 ಲಕ್ಷ ದಂಡ, ಬಿಜೆಪಿಗೆ ರಾಜಕೀಯ ಪ್ರತೀಕಾರದ ಆರೋಪ

ಲಖನೌ: ಸಮಾಜವಾದಿ ಪಕ್ಷದ ಮುಖ್ಯಸ್ಥ ಹಾಗೂ ಉತ್ತರ ಪ್ರದೇಶದ ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಅವರ ವಾಹನದ ಮೇಲೆ 8 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿದೆ. ಆಗ್ರಾ–ಲಖನೌ ಎಕ್ಸ್‌ಪ್ರೆಸ್‌ವೇಯಲ್ಲಿ ವೇಗ ಮೀರಿದ ಕಾರಣ ಈ ದಂಡ ವಿಧಿಸಲಾಗಿದೆ ಎಂದು ಟ್ರಾಫಿಕ್ ಇಲಾಖೆ ತಿಳಿಸಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಅಖಿಲೇಶ್ ಯಾದವ್, ಇದು ಕೇವಲ ದಂಡವಲ್ಲ, ಬಿಜೆಪಿ ಸರ್ಕಾರದಿಂದ ನಡೆಯುತ್ತಿರುವ ರಾಜಕೀಯ ಪ್ರತೀಕಾರ ಎಂದು ಆರೋಪಿಸಿದ್ದಾರೆ. “ನನ್ನ ವಾಹನಕ್ಕೆ ಬಂದಿರುವ ದಂಡದ ಚಲನ್‌ಗೆ ನಾನು ಪಾವತಿ ಮಾಡಲು ಹೇಳಿದ್ದೇನೆ. ಆದರೆ, ಇದು ಕೇವಲ ನಿಯಮ ಜಾರಿ ಅಲ್ಲ, ನಮ್ಮನ್ನು ಗುರಿಯಾಗಿಸಲು ನಡೆಯುತ್ತಿರುವ ರಾಜಕೀಯ ಆಟ” ಎಂದು ಅವರು ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ.

ಅವರು ಇನ್ನೂ ಪ್ರಶ್ನಿಸಿ, “ಟ್ರಾಫಿಕ್ ಕ್ಯಾಮೆರಾ ನಡೆಸುತ್ತಿರುವವರು ಬಿಜೆಪಿ ಜೊತೆಗಿನವರೇನಾ?” ಎಂದು ಸಂಶಯ ವ್ಯಕ್ತಪಡಿಸಿದ್ದಾರೆ.

ಈ ಘಟನೆ ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದ್ದು, ಬಿಜೆಪಿ ಮತ್ತು ಸಮಾಜವಾದಿ ಪಕ್ಷದ ನಾಯಕರ ನಡುವೆ ಆರೋಪ-ಪ್ರತ್ಯಾರೋಪಗಳು ನಡೆಯುತ್ತಿವೆ.