ಕಚೇರಿಯಲ್ಲಿಯೂ ಕ್ಯಾಂಟೀನ್ನಲ್ಲಿಯೂ ಗೋಮಾಂಸಕ್ಕೆ ನಿಷೇಧ ಹೇರಿದ್ದನ್ನು ವಿರೋಧಿಸಿ, ಬ್ಯಾಂಕ್ ಸಿಬ್ಬಂದಿ ಕಚೇರಿಯಲ್ಲೇ ಗೋಮಾಂಸ ಬಡಿಸಿದ ಅಪರೂಪದ ಪ್ರತಿಭಟನೆ ಕೇರಳದ ಕೊಚ್ಚಿಯಲ್ಲಿ ಕಂಡುಬಂದಿತು.
ಇತ್ತೀಚೆಗೆ ಬಿಹಾರ ಮೂಲದ ವ್ಯಕ್ತಿ ಈ ಶಾಖೆಯ ವ್ಯವಸ್ಥಾಪಕರಾಗಿ ಅಧಿಕಾರ ಸ್ವೀಕರಿಸಿದ್ದರು. ಅವರು ಕಚೇರಿ ಆವರಣ ಮತ್ತು ಕ್ಯಾಂಟೀನ್ನಲ್ಲಿ ಬೀಫ್ ಮಾರಾಟ ಹಾಗೂ ಸೇವನೆಯನ್ನು ನಿಷೇಧಿಸಿದ್ದು, ಇದರಿಂದ ಸಿಬ್ಬಂದಿಯಲ್ಲಿ ಆಕ್ರೋಶ ಮೂಡಿತು.
ಮೊದಲಿಗೆ ಬ್ಯಾಂಕ್ ನೌಕರರ ಒಕ್ಕೂಟ (BEFI) ವ್ಯವಸ್ಥಾಪಕರ ದುರ್ವ್ಯವಹಾರ ಮತ್ತು ಮಾನಸಿಕ ಹಿಂಸಾಚಾರದ ವಿರುದ್ಧ ಆಂದೋಲನ ನಡೆಸಲು ತೀರ್ಮಾನಿಸಿತ್ತು. ಆದರೆ ಬಳಿಕ ಗೋಮಾಂಸ ನಿಷೇಧದ ವಿಚಾರ ಹೊರಬಂದ ನಂತರ, ಒಕ್ಕೂಟವು ಅದನ್ನೂ ಸೇರಿಸಿ ಪ್ರತಿಭಟನೆಯನ್ನು ರೂಪಿಸಿತು. ಇದರ ಅಂಗವಾಗಿ ಸಿಬ್ಬಂದಿ ಕಚೇರಿಯ ಹೊರಭಾಗದಲ್ಲಿ ಬೀಫ್ ಹಾಗೂ ಪರೋಟಾ ತಿನ್ನುತ್ತಾ ತಮ್ಮ ವಿರೋಧವನ್ನು ತೋರಿಸಿದರು.
“ಇಲ್ಲಿ ಸಣ್ಣದೊಂದು ಕ್ಯಾಂಟೀನ್ ಇದೆ. ಆಯ್ದ ದಿನಗಳಲ್ಲಿ ಮಾತ್ರ ಇಲ್ಲಿ ಬೀಫ್ ನೀಡಲಾಗುತ್ತದೆ. ಆದರೆ ಇನ್ನು ಮುಂದೆ ಬೀಫ್ ನೀಡಬಾರದು ಎಂದು ಕ್ಯಾಂಟೀನ್ ಸಿಬ್ಬಂದಿಗೆ ಮ್ಯಾನೇಜರ್ ಹೇಳಿದ್ದಾರೆ. ಈ ಬ್ಯಾಂಕ್ ಸಂವಿಧಾನದ ಪ್ರಕಾರ ಕಾರ್ಯ ನಿರ್ವಹಿಸುತ್ತದೆ. ಆಹಾರ ಎನ್ನುವುದು ವೈಯಕ್ತಿಕ ಆಯ್ಕೆ. ಭಾರತದಲ್ಲಿ ಪ್ರತಿಯೊಬ್ಬರೂ ಅವರ ಆಹಾರವನ್ನು ಆಯ್ಕೆ ಮಾಡುವ ಸ್ವಾತಂತ್ರ್ಯ ಹೊಂದಿದ್ದಾರೆ. ನಾವು ಯಾರಿಗೂ ಬೀಫ್ ತಿನ್ನಲು ಒತ್ತಾಯ ಮಾಡುತ್ತಿಲ್ಲ” ಎಂದು ಫೆಡರೇಶನ್ ನಾಯಕ ಎಸ್ ಎಸ್ ಅನಿಲ್ ಹೇಳಿದರು.
ಈ ಪ್ರತಿಭಟನೆಯನ್ನು ರಾಜ್ಯದ ಹಲವು ರಾಜಕೀಯ ನಾಯಕರು ಸಹ ಬೆಂಬಲಿಸಿದರು. ಎಡಪಂಥೀಯರ ಬೆಂಬಲ ಹೊಂದಿರುವ ಸ್ವತಂತ್ರ ಶಾಸಕ ಕೆ.ಟಿ. ಜಲೀಲ್, “ಕೇರಳದಲ್ಲಿ ಸಂಘ ಪರಿವಾರದ ಕಾರ್ಯಸೂಚಿಗೆ ಯಾವತ್ತೂ ಅವಕಾಶವಿಲ್ಲ” ಎಂದು ಹೇಳಿ ಈ ಆಂದೋಲನವನ್ನು ಶ್ಲಾಘಿಸಿದರು. 2017ರಲ್ಲಿ ಕೇಂದ್ರ ಸರ್ಕಾರ ಜಾನುವಾರುಗಳ ವಧೆಗಾಗಿ ಮಾರಾಟಕ್ಕೆ ನಿರ್ಬಂಧ ವಿಧಿಸಿದ್ದ ನಿರ್ದೇಶನದ ವಿರುದ್ಧ ಕೇರಳದಲ್ಲಿ ಹಿಂದೆಯೂ ಅನೇಕ ಬಾರಿ ಗೋಮಾಂಸ ಪ್ರತಿಭಟನೆಗಳು ನಡೆದಿವೆ.
